دة حاجة كدة زي استطلاع راي, و هي مجموعة اسئلة لاي دارس للطب قريتها وعجبتني اوي وحبيت اجاوب عليها
1- هل اخترت دراسة الطب بنفسك, و هل اخترته عن اقتناع به ام لانه افضل خيار متاح ام كان للاخرون تاثير عليك؟
أيون .. دخلته عن اقتناع تام جدا .. وده كان بداية لمفهوم الهدف في حياتي .. وكان هدفي هو فعلا كلية الطب لاني حابب المهنة جدا
2- في بداية ايام دراستك للطب هل حسيت انك اخترت صح؟
لا .. تعبت جدا في بداية الدراسة
3- لما تعمقت شوية في دراسة الطب هل حسيت ان الدراسة دي هي اللي كنت متخيلها و لا حسيت انها مختلفة؟
مختلفة شوية .. بس بدات تبقي ممتعة وكمان بدات اتأقلم .. ودي أهم نقطة لطالب الطب .. بيتعود بسرعة وقدرته علي الاحتمال عالية
4- لما مشي بيك الزمن شوية هل حسيت انك حبيت الدراسة دي اكتر و زاد اقتناعك بيها و لا حسيت انك بتنفر منها و لا لم يتغير احساسك عن اجابة السؤال 2؟
طبعا حبيتها اكتر .. بقيت اذاكر حبا في المذاكرة .. مش علشان الامتحان ولا الدرجات
5- هل تري ان الطب ممكن تتم دراسته باسلوب مختلف عن الاسلوب الحالي و لا هل دة الاسلوب الوحيد المتاح, و ان كانت اجابتك بعد الرضا ماذا كنت تقترح؟
مش عارف .. بس متهيالي ممكن يكون فيه تنظيم للمناهج عن كده شوية .. وفيه حشو كتير اعتقد لابد انه يتعدل.. واعتقد الجزء العملي لابد من الاهتمام بيه شوية عن كده
6- ما هي محاسن دراسة الطب من وجهة نظرك؟
مهنة راقية جدا .. بغض النظر عن وضع الطبيب المصري الشاب في مصر ..
بتقربنا جدا من ربنا .. سبحان الله .. الجسم البشري معجزة في حد ذاته
اعتقد من خلالها بعرف قيمة الألم وبحترمه وبتخليني اشكر ربنا علي نعمة الصحة دايما .. ربنا يديمها نعمة ويحفظها من الزوال
7- ما هي مساوئ دراسة الطب من وجهة نظرك؟
stress .. مهنة رهيبة جدا وبتجيب توتر فظيع ..
8- في البداية و قبل ان تدرس الطب كنت شايف نفسك ممكن تتخصص ايه, و دلوقتي انت شايف نفسك ممكن تتخصص ايه؟
كنت ساعات بحلم اني جراح او دكتور عظام او أورام .. حقيقي دلوقتي مش عارف .. لكن انا ميال أوي لطب الاطفال او الاورام .
9- هل توافق علي فصل بعض التخصصات عن دراسة الطب الحالية علي طريقة طب الاسنان؟
مش عندي علم اوي بالنقطة دي ومش هقدر افتي فيها
10- هل تري نفسك في المستقبل طبيب ناجح؟
اتمني علي الاقل اكون مجتهد .. والنجاح والتوفيق من عند ربنا ان شاء الله
11- بنسبة كام في المية تعتقد ان الدراسة اللي بتدرسها حاليا هتفيدك في الحياة العملية؟
70 %
12- هل بتحس بالمتعة و انت بتذاكر الطب؟
اها .. لما بنسي فكرة الدرجات
13- هدفك الاول من المذاكرة هل هو عبور الامتحان ام الاستفادة العلمية ام الاثنين"مطلوب اجابة صريحة"؟
حاليا .. فعلا هدفي الاستفادة العلمية .. ودي هتجيب الدرجات ان شاء الله
-------
كان من 3 سنين الكلام ده , دلوقتي إجابتي متغيرتش أوي
بس في سؤال هزوده , خصوصا وإني دلوقتي بقيت طبيب إمتياز و خلصت سنين الدراسة
14- إيه أكبر سيئة في الكلية ؟
هــيــئــة الــتــدريــس
:)
ليست هناك تعليقات:
إرسال تعليق